صفحات من مدونات سورية

تونس ! هـــــــا تونس ! بشرفك تونس !

ما بعرف شو ممكن احكي على تونس وكيف بدي اكتب رأي اللي بالأصل لسع ماني بانيو
المشكلة انك تعيش حادثة غير انك تراقبها او تقارنها مع حادثة مشابهة بالتاريخ لأن التفاصيل الصغيرة اللي عم تعيشها صعب تقدر تقرر هل هية حقيقية وطبيعية ام الها دلالات تانية
من ناحية الانطلاقة فكانت مشابهة جدا لأيا حدث مرتبط بالتغيير.. متل كل الحروب العالمية والثورات (تفجرت) لمواقف بسيطة نسبية مع نتائجها
مع الانتباه لوجود تقاطع كبير وتشابه كبير مع الثورة الأشهر في التاريخ ( الثورة الفرنسية ) بنقطة اسباب حدوثها واللي برجعها كتيرين لحالة الافلاس اللي عانى منو الشعب والدولة بهديك الفترة ( مع اني بفضل شوفها كسبب بديهي لانتشار الفكر التنوريري في ظل الفساد السياسي وانعدام الحريات .. الفقر مو صفة جديدة تاريخيا طول عمرو موجود بالمجتمعات وبنسب متفاوتة بس ما دائما بكون في ثورات وهلشي بيرجع لقوة الفكر التنويري وسبب انتشارو طبعا هلحكي كلو بحسب رأي الشخصي يعني من فترة كان طلاب المدارس الفرنسية عم يحتجوا على نظام التقاعد مع انو واقعن افضل بكثير من واقع الطالب السوري مثلا .. بس الأخير ما بيفتح تمو بحرف وهلشي بيرجع لفرق فعالية الثقافة التنويرية بين الطلاب السوريين والفرنسيين !  )
غياب المرجعية بلمقارنة عم يخليني ضايع بقراءة التواريخ وتسلسل الاحداث
هل هية بطيئة ومفرطة بالبطئ او سريعة ومفرطة بالسرعة ،  انو بعد حرق الشب التونسي لنفسه طلعت مظاهرة .. المظاهرة اللي بعدا كانت بعد 9 ايام ( 18 كانون التاني مظاهرة  مدينة “سيدي بوزيد”- 27 مظاهرة العاصمة )
بعصر السرعة ما بعتقد في داعي لهلفترة حتى يصل الخبر من منطقة لتانية
بهلنقطة بتخيل الحراك الشعبي بكون آني ومباشر مو بعد 10 ايام
ومن جهى تانية ما عم استوعب كيف نظام حاكم البلد لمدة اكتر من 23 سنة بيسقط خلال ثورة غير مسلحة استمرت لاقل من شهرين هيك بهلبساطة ! لك اول انقلاب بسوريا ( حسني الزعيم على شكري القوتلي ) اخد مدة 140 يوم !
نقطة تانية ما عم اقدر حددها هية فعالية هلحركة .. لو عايشنا ايا نوع من الثورات المشابهة لقدرنا نقيمها هل هية حقيقية 100% او مجرد حراك شعبي غير موجه وما منو فايدة ، الأيام بدها تعلمنا وتخلينا نعرف متل هلحركات الشعبية شو ممكن تخلق من بعدا فرص . بس خوفي تكون مقولة “الثورة كالقطة تأكل اطفالها ” انكتبت خصيصا لهيك حالات
اكتر الافكار اللي عم تورد على راسي وانا عم تابع الاحداث بترجع لفيلم كتب نصو محمد الماغوط واخد بطولته دريد لحام
البعض بصنفو كوميدي والتاني بصنفو من باب ( النهفات ) بس هوي فعليا سياسي وبامتياز
طاغية معيّف الحارة بجشعو وطمعو ومقاسمته رزق العالم
بحراك شعبي قاده دريد لحام ( الحلاق اللي على نياتو ) بيقدروا العالم يقلعوا الطاغية الأولاني برات الحارة ويحصلوا على حريتن منو وبعينو الحلاق ( القائم وراء هلحراك ) كمرجعية وحامي بعد تقليع الطاغية وترك فراغ مكانو ( كونو رغم كل طغيانو عامل عنصر حماية للحارة من العالم الغريبة )
افراط العالم بالمغالاة بمدح الحلاق التشتوش حول الاخير لطاغية تاني مشابه تماما للطاغية الأولاني !!
الشعب بيرجع بيتحرك وبيقتنع انو فكرة الحماية ما رح يامنها هلنوع من الزعامات
فبقرر يرفع القضية لمستوى اعلى ويوصلها للحكومة حتى تلاقي حل للطغاة اللي ما حدا عرفان سبب وجودن ( مع العلم انو الشعب هوي اللي عم يصنعن )
المفاجأة كانت بانو استجابة الجهة المعنية كانت عن طريق اقامة مفخر شرطة برئاسة أحد أصحاب الثقة والكفىء للمهمة .. واللي كان هوي نفسو الطاغية الحلاق اللي صنعو الشعب !! بمعنى رجعت حليمة لعادتها القديمة بس بصيغة جديدة ! وهلشي بالنسبة الي متوقع بنسبة اكتر من 90% لواقع الشعب التونسي مستقبلاً لأنو بالاساس ما كان في تراكم وعي واحتكاك مع نماذج ديمقراطية بيتجسد معها حقيقة الحرية ( يمكن كون غلطان باعتبار شمال افريقيا ما بتحمل نسيج مشابه للشرق الأوسط … بس ما بتخيل ظروفو مختلفة كتير عننا لهيك متوقع يكونو متلنا بهلنقطة )
المزعج ولا قلكن ليش هلديبلوماسية بلكتابة خليني كون مباشر
الجزء اللي بيبعص انو العالم الحفظانتلها بيت شعر عم تقولو علطالعة والنازلة وكأنها عم تعيد تكوين البشرية او تعيد انتاج النظرية النسبية لأول مرة بتاريخنا الحديث
مكانك راوح هاد هوي شعبنا عاطفي غوغائي ما بيعرف يقيم الموقف بموضوعية ويتعامل معو بعقلانية ليستفيد منو ويتعلم من سير الاحداث فيو
بيفرح وبينعجق وبينعبط بحالو والدنيا ما بتساعو بثانية .. وبيبكي وبيردح وبيحرد وبكسّر كلشي حواليو بثانية تانية وبكل الاحوال خلال شهر بينسى الحالة اللي كان فيها سواء كانت ردح  او فرح وبيرجع للقالب اللي عايش فيو بميزانو الاعوج الجامع فيو النق مع الاقتناع بكفّة وحدة .
ومكانك راوح لا بيتحرك خطوة لقدام او لورا ( يمكن واقف محلو والبشرية عم تمشي لهيك بتحسو ماشي لورا .. بس هوي ثابت بمحلو )
متل الأصلع الفرحان بشعر حماية جارتو ومعتبرو عز وافتخار وحق مشروع انو يتغنى بجمالها
لك اصحى على حالك وشوف صلعتك اللي عم تلمع من المريخ بعدين تعا احكيلي بجمال الشعر وروعتو
http://hwine-nwine.blogspot.com/2011/01/blog-post.html

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

زر الذهاب إلى الأعلى